“راشن کی لائن میں لگی خواتین پر فلم بنانے میں کوئی دلچسپی نہیں”

ممبئی: بالی ووڈ کے معروف ہدایتکار سنجے لیلا بھنسالی نے اپنی زیادہ تر فلموں میں طوائف کا کردار دکھانے کی انوکھی وجہ بتا دی ہے۔

سنجے لیلا بھنسالی کا شمار بالی ووڈ کے اُن ہدایتکاروں میں ہوتا ہے جو اپنی فلموں میں طوائف کا کردار لازمی دکھاتے ہیں، وہ اب تک اپنی کئی فلموں میں طوائف کا کردار دکھا چکے ہیں۔

ہدایتکار نے فلم ‘دیوداس’ میں مادھوری ڈکشٹ، ‘گنگوبائی کاٹھیواڑی’ میں عالیہ بھٹ اور ‘ساوریا’ میں رانی مکھرجی کو طوائف کے کردار میں دکھایا جبکہ اُن کی حالیہ ویب سیریز ‘ہیرامنڈی: دی ڈائمنڈ بازار’ کی تو مکمل کہانی طوائفوں کے گرد ہی گھومتی ہے۔

بھارتی میڈیا کے مطابق سنجے لیلا بھنسالی نے اپنے حالیہ انٹرویو میں اس حوالے سے کُھل کر بات کی، اُنہوں نے کہا کہ طوائف ایسی خواتین ہوتی ہیں جن کے اندر بہت سے راز دفن ہوتے ہیں، ایسی خواتین ذہنی طور پر طاقتور اور بہادر ہوتی ہیں، ایسی خواتین مجھے اپنی طرف متوجہ کرتی ہیں، مجھے ان کے بارے میں جاننا کافی دلچسپ لگتا ہے۔

سنجے لیلا بھنسالی نے کہا کہ طوائف موسیقی اور رقص کے ذریعے اپنی خوشی اور غم کا اظہار کرتی ہیں، اُنہیں زندگی گزارنے کے آداب، لباس اور زیورات پہننے کا سلیقہ ہوتا ہے، یہ فن کی دُنیا میں ماہر ہوتی ہیں۔